Կանանց դերը Լեռնային Ղարաբաղի կոնֆլիկտի լուծման հարցում

Նոյեմբերի 6–ին, 2008թ., Քաղաքացիական հասարակության ինստիտուտում կազմակերպվել էր քննարկում՝ Կանանց դերը Լեռնային Ղարաբաղի կոնֆլիկտի լուծման հարցում թեմայի շուրջ։ Քննարկմանը մասնակցում էին Կանանց ռեսուրսային կենտրոնի անդամները՝ Երևանից և Շուշիից։ Մասնակիցների թվում էին նաև այլ հասարակական կազմակերպությունների ներկայացուցիչներ և ուսանողներ։

Հանդիպման ընթացքում Հասմիգ Թաթիոսյանը ներկայացրեց որոշակի տվյալներ, մասնավորապես, հետպատերազմյան շրջանում կանանց վիճակի մասին։ Հիմնական հարցադրումներն էին՝ արդյո՞ք, կարող են կանայք որևէ դեր ունենալ պատերազմի ընթացքում, և ինչպիսի՞ն է կանաց դերը խաղաղաշինության գործընթացում։

Խոսվեց նաև այն մասին, որ չնայած կանայք ավելի քիչ մասնակցություն ունեն մարտի դաշտում, բայց և այնպես, պատերազմի պատճառով նրանք կրում են տարբեր հետևանքներ, որոնք բավականին տարբերվում են տղամարդկանց կրած հետևանքներից։ Հատկանշական է նաև այն, որ հետպատերազմյան շրջանում կանայք ստանձնում են մի շատ կարևոր դեր. նրանք օգնում են իրենց ամուսիններին՝ փորձել մոռանալ պատերազմի դաժանությունները, և շատ հաճախ կանայք ընկնում են ծանր կացության մեջ։ Շատ կարևոր է որպես մայր՝ կնոջ դերը ընտանիքում, երեխաների դաստիարակության հարցում։ Մասնակիցների մի մասը կարծում էր, որ տարբեր ազգություններում դաստիարակությունը կարող է լինել լրիվ տարբեր և սա շատ կարևոր է հակամարտությունների կարգավորման գործընթացներում։

Հանդիպման ընթացքում ակնհայտ դարձավ մի բան, որ կանայք միշտ փորձում են գտնել խաղաղության հաստատման տարբեր ձևեր, և շատ հուսադրող էր այն, որ պատերազմի տարբեր դժվարություններն ու դաժանությունները տեսած կանայք չեն կորցրել իրենց հույսն ու ուժը՝ խաղաղության հաստատմանը որևէ կերպ նպաստելու համար։

Քննարկումը կազմակերպվել էր Խաղաղաշինության և կոնֆլիկտի հաղթահարման ծրագրի շրջանակներում՝ Կանանց ռեսուրսային կենտրոնի հետ համագործակցությամբ։