Հայաստանի փաստաբանների պալատի նախագահ Ռուբեն Սահակյանը հակադարձել է Հայաստանի գլխավոր դատախազ Աղվան Հովսեփյանի փաստաբանների հասցեին հնչեցրած հայտարարություններին:

«Ես ականատես եմ եղել ցինիկ, վայրագ. խուժան վերաբերմունքի դատավորի կողմից: Օրենքի լկտի ոտնահարումների փաստերի եմ հանդիպել թե' դատախազների, թե' դատավորների կողմից: Եթե մենք տեսնում ենք, որ փաստաբանը գործում է ճարահատյալ, այսինքն՝ տեսնում է, որ իր օրինական գործողությունները մերժվում են ապրիորի, եւ տեսնում է, որ դատարանը լկտի եւ ապօրինի գործողություններ է կատարում, փաստաբանը լքում է դատարանի դաճլիճը, ես չեմ մեղադրում այդ փաստաբանին», «Ազատություն» ռադիոկայանին տված հարցազրույցում ասել է փաստաբանների պալատի նախագահը։

Հայաստանի գլխավոր դատախազ Աղվան Հովսեփյանը երկուշաբթի օրը հայտարարել էր. - «Եթե փաստաբանը ուղղակի ցուցադրական մեթոդներով, վարքագծով դատարանում... փորձելով զորբայությամբ պաշտպանել իր ամբաստանյալին: Պաշտպանությունը երբեմն ուղղված է ոչ թե իրոք ամբաստանյալին պաշտպանելու, այլ ուղղակի իր իմիջը ձեւավորելու համար... Ես կուզեի, որ իրականում Հայաստանում որակյալ փաստաբաններ ունենայինք, ունենայինք արժանի հակառակորդներ»:

«Միշտ երազել եմ, որ հանդիպեմ գրագետ քննիչի, դատախազի, դատավորի», -հակադարձել է Ռուբեն Սահակյանը: - «Արժանի հակառակորդ են անվանում՝ թող լինի արժանի դատավարության մասնակից»:

Ռուբեն Սահակյանը պատասխանել է նաեւ Աղվան Հովսեփյանի այն հայտարարությունը, թե «մի շարք փաստաբաններ քաղաքական գործիչներ են ավելի շատ, քան պաշտպաններ»։

«Ձեր մեղքերը ինչո՞ւ եք բարդում փաստաբանների վրա: Ոտից գլուխ կեղտի մեջ թաղված եք: Ոտից գլուխ խախտումների մեջ թաղված եք: Մի քանի հարյուր խախտում կարող եմ ցույց տալ: Կոչ եմ անում՝ պարոն գլխավոր դատախազ, ոի միասին վերլուծենք այդ խախտումները՝ մամուլի ներկայացուցիչների ներկայությամբ... Եթե չեք գա, ապա բարի եղեք մեր մասին մի խոսեք: Մի ասեք՝ կայացել է թե ոչ փաստաբանական ծառայությունը: Սկզբից կայացրեք դատախազությունը»: