Մոսկվայի իրավապահները երեկ ընդհանուր առմամբ մոտ երեք տասնյակ հայ երիտասարդների են բերման ենթարկել: Նրանք պետք է վարչական տույժ վճարեն չարտոնված ցույցերին մասնակցելու համար:

Արդեն մի քանի տարի շարունակ ապրիլի 24-ին հայ երիտասարդները արտոնված բողոքի ցույց են անցկացնում Մոսկվայում Թուրքիայի դեսպանատան շենքի մոտ` պահանջելով ճանաչել Հայոց ցեղասպանությունը: Երեկ, սակայն, իրավապահները թույլ չտվեցին անցկացնել ցույցը, քանի որ չկար իշխանությունների համապատասխան թույլտվությունը:

Իրավապահները փակել էին Թուրքիայի դեսպանատանը հարող փողոցը եւ թույլ չէին տալիս հավաքված հարյուրավոր երիտասարդներին մոտենալ դեսպանության շենքին:

Երկար բանակցություններից հետո ցուցարարները կարողացան ոստիկաններին համոզել, որ թույլ տան մեքենաներով անցնել շենքի մոտով` պայմանով, որ կհանեն մեքենաներին ամրացված Հայաստանի դրոշները եւ կանգ չեն առնի:

Հայերը, այդուամենայնիվ, անցկացրին ցույցը Թուրքիայի դեսպանությանը հարող հրապարակում: Ոստիկանները հորդորում էին նրանց հեռանալ:

Դեսպանատան մոտից հայ երիտասարդները շարժվեցին դեպի Թուրքիայի դեսպանի առանձնատուն` Բոլշայա Նիկոլսկայա փողոցում, որտեղ դեսպանը հրաժեշտի երեկո էր կազմակերպել` դիվանագիտական առաքելությունների ղեկավարների, Ռուսաստանի իշխանությունների ներկայացուցիչների մասնակցությամբ: Առանձնատան մոտ մի խումբ երիտասարդներ այրեցին Թուրքիայի դրոշը:

Հայ երիտասարդների մի խումբ էլ երեկոյան հավաքվել էր Վորոբյովի Գորի հրապարակում: Հայ դատի մոսկովյան գրասենյակի ղեկավար Յուրի Նավոյանը տեղեկացրել է, որ այս տարի ցույցի կազմակերպման պատասխանատուն եղել է Ռուսաստանի հայերի միության Մոսկվայի կազմակերպությունը. - «Իրենց ոչ մերժել, ոչ արտոնել էին, փաստաթղթային գրագրության մեջ էին, իսկ իրենք խաբել են ժողովրդին` թե թույլտվություն կա»: