Ինչպես տեղեկացնում է ՀՀ գլխավոր դատախազությունը, Սահմանադրական կարգի խախտմամբ պետական իշխանությունը յուրացնելու նպատակով Երեւան քաղաքում զանգվածային անկարգություններ հրահրելու եւ կազմակերպելու առթիվ ՀՀ հատուկ քննչական ծառայության վարույթում քննվող քրեական գործի շրջանակներում ավարտվել է եւս 4 մեղադրյալի՝ Սողոմոն Երիցյանի, Հարություն Մկրտչյանի, Յաշա Մելքոնյանի եւ Հովհաննես Մխոյանի մասով նախաքննությունը: Նրանց վերաբերյալ գործերն անջատվել են առանձին վարույթ եւ ուղարկվել դատարան:

Յ.Մելքոնյանին եւ Ս.Երիցյանին մեղադրանք է առաջադրվել ՀՀ քրեական օրենսգրքի 316-րդ հոդվածի 1-ին մասով ( իշխանության ներկայացուցչի կյանքի ու առողջության համար ոչ վտանգավոր բռնության գործադրում՝ կապված նրա ծառայողական պարտականությունների կատարման հետ), Հ.Մկրտչյանին՝ ՀՀ քրեական օրենսգրքի 225-րդ հոդվածի 2-րդ մասով՝ զանգվածային անկարգություններին անմիջական մասնակցություն ունենալու համար, Հ. Մխոյանին՝ՀՀ քրեական օրենսգրքի 334-րդ հոդվածի 1-ին մասով՝ պետական իշխանությունը բռնությամբ զավթելուն ուղղված գործողություններ անելու, զանգվածային անկարգություններ հրահրելու եւ կազմակերպելու մեղադրանքով հետախուզման մեջ գտնվող Սասուն Միքայելյանին իրավապահ մարմիններից թաքնվելու հարցում աջակցելու, նրան պարտակելու համար:

Սահմանադրական կարգի խախտմամբ պետական իշխանությունը յուրացնելու նպատակով Երեւան քաղաքում զանգվածային անկարգություններ հրահրելու եւ կազմակերպելու առթիվ ՀՀ հատուկ քննչական ծառայության վարույթում քննվող քրեական գործի շրջանակներում, ապրիլի 15-ի դրությամբ, նախնական կալանքի տակ է գտնվում 78 անձ, եւս 16 մեղադրյալի նկատմամբ որպես խափանման միջոց է ընտրվել ստորագրություն՝ չհեռանալու մասին: Եվս երեք անձ ձերբակալվել է 2008 թվականի մարտի 1-2-ին տեղի ունեցած զանգվածային անկարգություններին անմիջական մասնակցություն ունենալու կասկածանքով:

Ապրիլի 15-ի դրությամբ դատարան է ուղարկվել 20 քրեական գործ՝ 20 անձի վերաբերյալ, որոնցից 3-ի՝ Դավիթ Համբարձումյանի, Մեսրոպ Զաքարյանի եւ Ռաջու Պետրոսյանի մասով դատաքննությունն ավարտվել է: Նշված երեք մեղադրյալներն ընդունել են առաջադրված մեղադրանքը եւ նրանց խնդրանքով կիրառվել է արագացված դատաքննության կարգը: Երեւանի Կենտրոն եւ Նորք-Մարաշ համայնքների ընդհանուր իրավասության դատարանը հիմնավորված է համարել Դ.Համբարձումյանին, Մ.Զաքարյանին եւ Ռ.Պետրոսյանին ՀՀ քրեական օրենսգրքի 316-րդ հոդվածի 1-ին մասով առաջադրված մեղադրանքը (իշխանության ներկայացուցչի կյանքի ու առողջության համար ոչ վտանգավոր բռնության գործադրում՝ կապված նրա ծառայողական պարտականությունների կատարման հետ):

Կենտրոն և Նորք-Մարաշ համայնքների ընդհանուր իրավասության դատարանի 12.04.08թ. դատավճռով Դ.Համբարձումյանը դատապարտվել է ազատազրկման 1 տարի 6 ամիս ժամկետով, ՀՀ քրեական օրենսգրքի 70-րդ հոդվածի կարգով Դավիթ Համբարձումյանի նկատմամբ նշանակված պատիժը պայմանականորեն չի կիրառվել` սահմանելով փորձաշրջան 2 տարի ժամկետով:

Նույն դատարանի 14.04.08թ. դատավճիռներով Մ.Զաքարյանը դատապարտվել է ազատազրկման 2 տարի ժամկետով, ՀՀ քրեական օրենսգրքի 70-րդ հոդվածի կիրառմամբ նրա նկատմամբ նշանակված պատիժը պայմանականորեն չի կիրառվել` սահմանելով փորձաշրջան 2 տարի ժամկետով, իսկ Ռ.Պետրոսյանը՝ դատապարտվել է ազատազրկման 2 տարի 6 ամիս ժամկետով: