Հայաստանի Հանրապետության անկախության 15-ամյակին նվիրված զորահանդեսը անկախ
Հայաստանի թվով 4-րդ զորահանդեսն էր:

Երեւանի Հանրապետության հրապարակում անցկացված զորահանդեսին մասնակցում էին երկրի
զինված ուժերի բոլոր զորատեսակները՝ բացի թրթուրավոր զրահատեխնիկայից: Մասնակցում
էին նաեւ Լեռնային Ղարաբաղի Հանրապետության պաշտպանության բանակի ստորաբաժանումներ:

Զորահանդեսի հրամանատարը Հայաստանի Հանրապետության զինված ուժերի գլխավոր շտաբի պետ,
պաշտպանության փոխնախարար, գեներալ-գնդապետ Միքայել Հարությունյանն էր: Զորահանդեսն
ընդունեց պաշտպանության նախարար Սերժ Սարգսյանը:

Անկախության տոնի առթիվ ներկաներին շնորհավորական խոսքով դիմեց հանրապետության
նախագահ, երկրի զինված ուժերի գերագույն գլխավոր հրամանատար Ռոբերտ Քոչարյանը:

«Այսպիսի թանկ հոբելյանը ոգեւորիչ է եւ պարտավորեցնող: Անել առավելագույնը հանուն
Հայաստանի հզորացման, ջանք չխնայել՝ կառուցելու այն նոր երկիրը, որի քաղաքացին
լինելը հպարտություն կներշնչի մեր ժողովրդի բազմաթիվ սերունդներին», - իր խոսքում
շեշտեց նախագահը:

Զորահանդեսը սկսվեց Մոնթե Մելքոնյանի անվան ռազմաուսումնական վարժարանի
թմբկահարների քայլերթով: Այնուհետեւ հրապարակ մտան երկրի զինված ուժերի բանակային
կորպուսների ստորաբաժանումները:

Զորահանդեսին կարելի էր հետեւել նաեւ հրապարակում տեղադրված էկրանի միջոցով:

«Ամերիկայից եկել ենք, որ այս օրը տեսնենք: Ամեն ինչով լավն է», - «Ազատություն»
ռադիոկայանի թղթակցի հետ զրույցում ասաց ամերիկահայ մի կին:

«Անկախությունը մեր բոլորիս իղձը, նպատակն էր, որին, բարեբախտաբար, հասել ենք: Դա,
առաջին հերթին, ազատություն է, երկրորդ հերթին՝ պատասխանատվություն, որ մենք
ինքներս մեր ճակատագիրը պետք է այսուհետեւ տնօրինենք», - «Ազատություն»
ռադիոկայանին ասաց հրապարակում զորահանդեսին հետեւող մի երիտասարդ կին:

Հովհաննես Շողիկյան