Եհովայի վկաների թիվը Հայաստանում 2005 թվականին աճել է 5 տոկոսով: Ըստ
«Կովկասպրես» գործակալության, այդ է վկայում ԱՄՆ-ի Բրուքլինի կենտրոնի զեկույցը:

Այդ փաստաթղթի համաձայն, Ադրբեջանում Եհովայի վկաների թիվն ավելացել է 15 տոկոսով,
եւ դա ամենաբարձր ցուցանիշն է ԱՊՀ-ում: Ռուսաստանում Եհովայի վկաները թիվն աճել է
3, իսկ Վրաստանում՝ 2 տոկոսով:

Աշխարհի 235 երկրների տվյալները ներառող ցեկույցը վկայում է, որ մեկ տարվա
ընթացքում Եհովայի վկաների ընդհանուր թիվը 6 միլիոն 308341-ից աճել է մինչեւ 6
միլիոն 390016:

Մինչդեռ, Forum 18 News Service-ի տեղեկություններով, Հայաստանում շարունակում է
աճել կալանավայրերում գտնվող խղճի կալանավորների թիվը: Ներկայումս կրոնական
նկատառումներով զինծառայությունից հրաժարվելու համար դատապարտվել ու
կալանավայրերում են գտնվում 48 Եհովայի վկաներ ու մոլոկաններ: Նշվում է, որ թեեւ
Հայաստանում 2004 թվականից գործում է «Այլընտրանքային զինծառայության մասին»
օրենքը, այն շարունակում է մնալ զինվորականների վերահսկողության տակ:

«Չի կարելի ասել, թե Հայաստանում գոյություն ունի այլընտրանքային ծառայություն», -
Forum 18-ին ասել է Հայաստանում Եվրախորհրդի ներկայացուցիչ Բոյանա Ուրումովան:

Հայաստանի արդարադատություն նախարար Դավիթ Հարությունյանը ասել է, որ պատրաստվում է
օրենքի նոր տարբերակ, որը «շատ շուտով» կներկայացվի Ազգային ժողով: