«Ադրբեջանի իշխանությունները Կարմիր խաչի միջազգային կոմիտեին տեղեկացրել են ևս մեկ հայ գերու մասին», - երկուշաբթի օրը «Ազատություն» ռադիոկայանին տեղեկացրեց կոմիտեի երևանյան գրասենյակի հաղորդակցման ծրագրի ղեկավար Աշոտ Աստաբացյանը:
Կորած տղամարդու հարազատները Կարմիր Խաչի միջազգային կոմիտեի երևանյան գրասենյակին էին դիմել այս տարվա մայիսին, բայց Ադրբեջանը միայն անցած շաբաթավերջին է տեղյակ պահել գերեվարվածի մասին:

«Ադրբեջանի իշխանությունները տեղեկացրել են Կարմիր խաչի միջազգային կոմիտեի պատվիրակությանը հայ քաղաքացիական անձի վերաբերյալ, որը գտնվում է գերության մեջ: Անուն-ազգանունը չեմ հրապարակի: Նոյեմբերի 5-ին Կարմիր խաչի միջազգային կոմիտեն այցելել է այդ անձնավորությանը և տեղեկացրել է իր ընտանիքի անդամներին», - նշեց Աստաբացյանը: - «Չեմ կարող ասել, թե արդյո՞ք Ադրբեջանը պատրաստ է նրան հանձնել հայկական կողմին: Եթե նմանատիպ որոշում ընդունվի, մենք անպայման մամլո հաղորդագրություն կտարածենք»:

Կարմիր խաչի տվյալներով` ադրբեջանական կողմում 6 հայ ռազմագերիներ են գտնվում, 5 հոգանոց մեկ ընտանիք, և, փաստորեն, այժմ հայտնի է դարձել ևս 1 գերու մասին:

Հայկական կողմում մնում են երկու ադրբեջանցի ռազմագերիներ:

«Այս պահին հերթական փոխանակումն իրականացնելու մասին համաձայնություն չկա», - «Ազատություն» ռադիոկայանին փոխանցեց Կարմիր Խաչի ներկայացուցիչ Աշոտ Աստաբացյանը:

Հոկտեմբերի 27-ինԱստրախանում կայացած Ռուսաստանի, Հայաստանի և Ադրբեջանի եռակողմ հանդիպման արդյունքում որոշվել է որպես հակամարտող կողմերի միջև վստահության ամրապնդմանն ուղղված առաջին քայլ անհապաղ իրականացնել ռազմագերիների և զոհվածների մարմինների փոխանակում` ԵԱՀԿ-ի Մինսկի խմբի և Կարմիր Խաչի միջազգային կոմիտեի աջակցությամբ:

Աստրախանյան հանդիպումից հետո Ադրբեջանը հայկական կողմին է հանձնել երկու քաղաքացիականների` գերության մեջ զոհված Հայաստանի քաղաքացի, 20-ամյա Մանվել Սարիբեկյանի և Լեռնային Ղարաբաղի քաղաքացի Գավրուշ Առուստամյանի դիերը:

Հայկական կողմը Ադրբեջանին է հանձնել Հայաստանի սահմանը ապօրինաբար հատած ադրբեջանցի Էլդար Թաղիևին, ինչպես նաև ադրբեջանցի զինծառայողներ Մուբարիզ Իբրահիմովի և Ֆարիդ Ահմեդովի դիերը: Վերջիններս զոհվել են Ղարաբաղի պաշտպանության բանակի և Ադրբեջանի զինված ուժերի շփման գծում տեղի ունեցած բախումների ժամանակ, առաջինը` հունիսի 18-ին, երկրորդը` սեպտեմբերի 4-ին: Բաքվում Իբրահիմովին հետմահու ազգային հերոսի կոչման են արժանացրել:

Աղբյուր՝ www.azatutyun.am