Ձերբակալված կամ կալանավորված անձը իրավունք ունի («Ձերբակալված եւ կալանավորված անձանց պահելու մասին» ՀՀ օրենքի հոդ. 13).

– իրեն հասկանալի լեզվով տեղեկություններ ստանալու իր իրավունքների, ազատությունների եւ պարտականությունների մասին,

– իր նկատմամբ բարեկիրթ վերաբերմունքի,

– բողոքելու համապատասխան կալանավայրի վարչակազմին, վերադաս ինքնակառավարման մարմիններին, դատախազին, դատարանին, պետական եւ տեղական ինքնակառավարման մարմիններին, հասարակական մարմիններին եւ կուսակցություններին, ԶԼՄ-ներին, միջազգային կազմակերպություններին իր իրավունքների եւ ազատությունների խախտման դեմ՝ թե՛ անձամբ եւ թե՛ պաշտպանի կամ օրինական ներկայացուցչի միջոցով,

– բժշկական եւ իրավաբանական օգնություն ստանալու, սոցիալական ապահովության, առողջության պահպանման, բավարար սնունդ ստանալու,

– անձնական անվտանգության ապահովման,
– մտքի, խղճի եւ դավանանքի, քաղաքական կամ այլ հայացքների ազատության,

– արտաքին աշխարհի հետ հաղորդակցվելու, հանգստի (բացօթյա զբոսանք, մարմնամարզություն, 8-ժամյա քուն),

– իր մոտ ունենալու իրեն եւ իր իրավունքներին առնչվող փաստաթղթեր ու գրառումներ, բացառությամբ պետական կամ ծառայողական օրենքով պահպանվող գաղտնիք պարունակող փաստաթղթերի:
Հարց. Թե՛ ձերբակալվածը, թե՛ կալանավորվածը նույն իրավունքնե՞րն ունեն:

Պատ. Բացի վերը թվարկված իրավունքներից, որոնք պատկանում են թե՛ ձերբակալված եւ թե՛ կալանավորված անձանց, միայն կալանավորված անձն իրավունք ունի նաեւ.

– ստանալու կրթություն, զբաղվելու ստեղծագործական աշխատանքով, աշխատելու,

– ձեռք բերելու սնունդ, առաջին անհրաժեշտության առարկաներ վարչակազմի միջոցով կամ կալանավայրերի խանութից կամ կրպակից, ստանալու եւ ուղարկելու դրամական փոխանցումներ: