Շաբաթ լույս կիրակի օրվա գիշերը հարձակումներ են տեղի ունեցել թիվ 19 ընտրատարածքում մեծամասնական ընտրակարգով գրանցված պատգամավորության թեկնածուներ Հակոբ Հակոբյանի ավտոմեքենայի եւ Սուսաննա Հարությունյանի նախընտրական շտաբի վրա:

Հակոբ Հակոբյանը «Ազատություն» ռադիոկայանին պատմեց, որ կեսգիշերից քիչ անց ընկերոջ հետ գնացել էր Զվարթնոցի մի օբյեկտ, եւ երբ իջել են մեքենայից ու պահակին զգուշացրել, որ շուտով գալու է իրենց մյուս ընկերը, 3-4 րոպե անց ավտոմատի կրակահերթ են լսել. - «Պատի մյուս կողմը ազատամարտիկների գերեզմաններ կան, եւ մի պահ ես մտածեցի, որ երեւի պատի այն կողմից է. մարդիկ են, երեւի խմել են, եկել են կրակում են` իրենց հարգանքի տուրքն են մատուցում: Բայց երբ զգացինք, որ ինչ-որ բանի են դիպչում [փամփուշտները], միանգամից ներս վազեցինք, այդ ներս վազելու ժամանակ կրակոցներն արդեն դադարեցին: Մի 10 րոպե մենք դուրս չեկանք այդտեղից: Հետո դուրս եկանք ու տեսանք, որ մեր կանգնած տեղի ուղղությամբ էին կրակել եւ մեքենայի վրա: Այնտեղ օբյեկտ կա` այդ օբյեկտի վրա էին հիմնականում փամփուշտները գնացել»:

Նրա խոսքերով, մեքենային դիպել է 20-30 փամփուշտ:

Հակոբ Հակոբյանը դժվարացավ միանշանակ ասել` արդյոք կապվա՞ծ է այդ հարձակումը առաջիկա ընտրությունների հետ. - «Պարզապես համընկնում է ընտրությունների օրերի հետ, եւ ավելի շատ կարելի է կասկածել այդ ուղղությամբ: Բայց կոնկրետ որ ասեմ` ինձ ահազանգ է եկել, կամ մեկն ասել է` «Թեկնածությունդ հանիր, պայքարից դուրս արի, հակառակ դեպքում` կկրակենք», նման խոսակցություն չի եղել: Պարզապես մենք էլ ենք մտածում, որ սա կարող է կապված լինել զուտ ընտրությունների հետ»:

Պատգամավորության թեկնածուն վստահեցրեց, որ միջադեպը իր քարոզարշավի ընթացքի մեջ փոփոխություն չի մտցնի:

Միաժամանակ, նա հայտնեց, որ ընտրատարածքային ընտրական հանձնաժողովի` մեծ դժվարությամբ կայացրած որոշումը իր թեկնածությունը գրանցելու մասին վիճարկվել է դատարանում. - «Հիմա մենք մեր քարոզչությունը թողնելով` պետք է գնանք դատարաններ ու պարզաբանենք, թե իրականում ինչ ենք ուզում: Իրականում ուզում ենք գնալ արդար ընտրությունների, գնալ եւ պայքարել, եւ ժողովուրդը ում ձայն կտա` թող նա էլ գնա եւ աշխատի Ազգային ժողովի պատգամավոր»:

Սուսաննա Հարությունյանը, իր հերթին, «Ազատություն» ռադիոկայանին պատմեց, որ լույս կիրակի օրվա գիշերը ժամը 4:00-ին մոտ այրվել են իր նախընտրական շտաբի այն 4 սենյակները, որտեղ ենթաշտաբների համար հատկացված ամբողջ կահույքն է եղել. - «Գիշերվա ժամը 4:00-ին, փաստորեն, ոստիկանությունում էլ է եղել հայտարարություն, իմացել են, բայց ինձ չեն զգուշացրել, ես առավոտյան ժամը 9:30-ին եմ իմացել»:

«Բանականությանս մեջ ուղղակի չի տեղավորվում, որ իրեն տղամարդ կոչող մարդը, որը իմ մրցակիցն է, կարող է իրեն այս տեսակ այլանդակություններ թույլ տալ», - հայտարարեց Սուսաննա Հարությունյանը:

Այն հարցին, թե հատկապես ո՞ր մրցակցին ի նկատի ունի, պատգամավորության թեկնածուն պատասխանեց. - «Մի մրցակիցը ձեւական է, նրա մասին չեմ խոսում, մյուս մրցակցի վրա էլ մահափորձ է եղել նույն գիշերը: Խոսքը գեներալի մասին է»:

«Սրանից առաջ, ինչպես գիտեք, ընտրատարածքային ընտրական հանձնաժողովը չէր հաստատում, հազիվ հաստատեցին մեր թեկնածությունները, հիմա էլ դատարան են դիմել` երկուշաբթի օրը նաեւ դատի ենք, կիրակի էլ հրկիզեցին: Այսինքն, ամեն օր մի բանի առաջ ենք կանգնում», - ընդգծեց Սուսաննա Հարությունյանը:

Էջմիածնի թիվ 19 ընտրատարածքում գրանցված են չորս թեկնածուներ` ներկայիս Ազգային ժողովի հանրապետական պատգամավոր Հակոբ Հակոբյանը, անկուսակցական, Հայաստանի զինված ուժերի 4-րդ բանակային կորպուսի նախկին հրամանատար, գեներալ Սեդրակ Սարոյանը, անկուսակցական Սուսաննա Հարությունյանը եւ Հայաստանի հանրապետական կուսակցության անդամ, Արաբկիրի համայնքապետի օգնական, քաղաքացիական նախաձեռնության առաջադրված Հակոբ Հակոբյանը: Սեդրակ Սարոյանին առաջադրել է Հանրապետական կուսակցությունը, մյուս երեք թեկնածուներն առաջադրվել են քաղաքացիական նախաձեռնությամբ:

Գեւորգ Ստամբոլցյան, Պրահա