Երեկ երեկոյան ոստիկանությունում մոտ 20 ժամ պահվելուց հետո ազատ են արձակվել Հայրենիք եւ պատիվ կուսակցության նախագահ Գառնիկ Մարգարյանն ու Գորիսի նախկին քաղաքապետ Սամվել Հարությունյանը։ Սամվել Հարությունյանը միացել է Ազատության հրապարակում հավաքվածներին, ելույթ ունեցել:

Իսկ ահա Հայաստանի գլխավոր դատախազի նախկին տեղակալ, փետրվարի 23-ին ձերբակալված Գագիկ Ջհանգիրյանին ոչ միայն չեն ազատել, այլ արդեն մեղադրանք են առաջադրել Քրեական օրենսգրքի 235 հոդվածի առաջին մասով` «Ապօրինի զենք եւ զինամթերք պահելը, փոխադրելը, կրելը», եւ 316 հոդվածի առաջին մասով` «իշխանության ներկայացուցչի նկատմամբ բռնություն գործադրելը»:

Գագիկ Ջհանգիրյանը այսօր առավոտյան տեղափոխվել է «Վարդաշեն» քրեակատարողական հիմնարկ:

Ոստիկանության հասարակայնության հետ կապերի եւ լրատվության վարչության տարածած տեղեկությունների համաձայն, Գագիկ Ջհանգիրյանի հետ ձերբակալված նրա եղբորը` Վարդան Ջհանգիրյանին, մեղադրանք է առաջադրվել Քրեական օրենսգրքի 316 հոդվածի երկրորդ մասով` «Իշխանության ներկայացուցչին` օրենքով նրա վրա դրված պարտականությունները կատարելու ժամանակ դիմադրելը կամ նրան ակնհայտ ապօրինի գործողություններ կատարելուն հարկադրելը, որը կատարվել է բռնությամբ կամ բռնություն կատարելու սպառնալիքով»:

Իսկ երեկոյան Տավուշի մարզի Կոթի գյուղում ձերբակալվել է 1992-96 թվականներին Հայաստանի ներքին գործերի նախարար, 1996-ից մինչեւ 1998 թվականի իշխանափոխությունը Երեւանի քաղաքապետ, ներկայումս հետախուզման մեջ գտնվող Վանո Սիրադեղյանի ավագ եղբայրը` Սերյոժա Սիրադեղյանը:

Սերյոժա Սիրադեղյանի տան խուզարկության ժամանակ հայտնաբերվել եւ առգրավվել է ՏՕԶ տեսակի հրացան` առանց փամփուշտի, ինչը եւ հիմք է հանդիսացել ձերբակալման: «Ընդհանուր առմամբ, ձերբակալման հիմնավորումը այն է, որ մնալով ազատության մեջ` կարող է թաքնվել վարույթը իրականացնող մարմնից եւ խոչընդոտել մինչդատական վարույթում քրեական գործի քննությունը», -հայտարարել է փաստաբան Տիգրան Տեր–Եսայանը:

Տիգրան Տեր-Եսայանի վկայությամբ, ապօրինի զենք եւ զինամթերք պահելու կասկածանքով ձերբակալվել է նաեւ Նոյեմբերյանի բնակիչ Յուրա Մամյանը:

Երեքշաբթի օրը խուզարկություն էր իրականացվել Հայաստանի առաջին նախագահ Լեւոն Տեր-Պետրոսյանի կողմնակիցներից` Ազգային անվտանգության ծառայության նախկին փոխնախարար Գուրգեն Եղիազարյանի տանը: Խուզարկությունից հետո նրան բերման էին ենթարկել, ապա որոշ ժամանակ անց ազատ արձակել:

Նույն օրը խուզարկություն է իրականացվել նաեւ Երկրապահ կամավորականների միության Արաբկիրի տարածքային կառույցի ղեկավար Հովհաննես Հարությունյանի տանը: Նրա կնոջ վկայությամբ, Ազգային անվտանգության ծառայության եւ ոստիկանության աշխատակիցներն այցելել են այն ժամանակ, երբ Հարությունյանը տանը չի եղել: Խուզարկությամբ հայտնաբերել եւ առգրավել են ՏՏ տեսակի ատրճանակ, որը նվիրել էր նախկին վարչապետ Անդրանիկ Մարգարյանը, Սայգա տեսակի երկու հրացան, փամփուշտներ, Հարությունյանի` ծննդյան օրը նվեր ստացած դաշույնները: