Նոր Ժամանակներ կուսակցության նախագահ, ներկայում կալանավորված Արամ Կարապետյանի առողջական վիճակը վատ է, նա ունի սրտի հետ կապված առողջական խնդիրներ, այսօր լրագրողներին տեղեկացրել են կուսակցության վարչության անդամները:

Այդ կապակցությամբ, ՆԺԿ վարչության անդամ Հրաչյա Սարգսյանը ասել է, որ հայտարարում է անժամկետ հացադուլ, որն անցկացնելու է Գլխավոր դատախազության շենքի առաջ: Հրաչյա Սարգսյանն ունի երկու պահանջ` Արամ Կարապետյանին մեկուսարանից տեղափոխել մասնագիտացված սրտաբանական բուժկենտրոն եւ ենթարկել հետազոտության, ապա եւ նրան ազատ արձակել: Այդ երկու պահանջն է ներկայացնում ՆԺԿ վարչության անդամը, ով հայտարարել է հացադուլ սկսելու մասին:

Արամ Կարապետյանի պաշտպանը լինելու համաձայնություն տված փաստաբան Տիգրան Տեր-Եսայանն էլ ասել է, թե Կարապետյանին մասնագիտացված բուժկենտրոն տեղափոխելու մասին մայիսի 15-ին զրուցել է գործի քննիչ, Ազգային անվտանգության վարչության հատուկ կարեւորության գործերի հատուկ քննիչ, գնդապետ Մարուքյանի հետ: Զրույցի արդյունքը դեռ հայտնի չէ, իսկ Արամ Կարապետյանը շարունակում է մնալ քրեակատարողական հիմնարկում:

Մայիսի 15-ին, ժամը 17.25-ին լրանում է Արամ Կարապետյանի կալանքը երկարաձգելու վերաբերյալ միջնորդություն ներկայացնելու ժամկետը: Սակայն Կարապետյանի փաստաբան Հարություն Բաղդասարյանը նշել է, որ ինքն այդ կապակցությամբ չի ստացել որեւէ գրություն: Բաղդասարյանն ինքը մայիսի 14-ին միջնորդել է հաշվի առնելով Արամ Կարապետյանի առողջական վիճակը, փոխել նրա խափանման միջոցը, սակայն դեռ պատասխան չի ստացել: