Ազատամարտիկներ Ժիրայր Սեֆիլյանի եւ Վարդան Մալխասյանի կողմնակիցները դիմել են Երեւանի քաղաքապետարան՝ հուլիսի 17-ին Մանկական զբոսայգում հավաք անցկացնելու խնդրանքով, սակայն քաղաքապետարանը մերժել է, վկայակոչելով Ոստիկանության եւ Ազգային անվտանգության ծառայության եզրակացությունները:

Քաղաքապետարանի պաշտոնական որոշման մեջ նշվում է, որ ըստ Ոստիկանության եզրակացության՝ «նախատեսված հավաքի ժամանակ մի շարք մասնակիցներ հրահրելու են բախումներ ոստիկանության ծառայողների հետ»:

Իսկ Ազգային անվտանգության ծառայությունը կարծիք է հայտնել, թե «միջոցառման կազմակերպիչները պատրաստվում են կատարելու զանգվածային անկարգություններ, իշխանության ներկայացուցիչների հանդեպ սադրիչ եւ այլ հակաիրավական գործողություններ»:

Ժիրայր Սեֆիլյանը լրագրողներին տեղեկացրել է, որ քաղաքապետարանը հավաքի կազմակերպիչներին որեւէ այլընտրանքային տարբերակ չի առաջարկել։