ՀՀ տարածքային կառավարման նախարարության միգրացիոն գործակալության տվյալներով, Հայաստանի սահմանամերձ բնակավայրերից ներքին տեղահանված անձանցից իրենց ծագման բնակավայրեր վերադարձի ցանկություն են հայտնել ավելի քան 2600-ը:

Գործակալության պետ Գագիկ Եգանյանը այսօր խոսել է ՀՀ կառավարության վերջին նիստում հավանության արժանացած «Հայաստանի սահմանամերձ բնակավայրերից ներքին տեղահանված անձանց իրենց ծագման բնակավայրեր վերադարձի կազմակերպման ծրագիրը»։

«Ծրագիրը երկու բաղադրիչ ունի: Բաղադրիչ մեկ` վերաբնակեցում, որը այդ ընտանիքների վերադարձի կազմակերպումն է, 1005 ընտանիքի` տրամադրելով որոշակի օժանդակություն տրանսպորտային ծախսերը հոգալու համար (ընտանիքի յուրաքանչյուր անդամին 45 դոլար), տրամադրելով յուրաքանչյուր ընտանիքին սերմացու, գործիքներ գնելու համար որոշակի օժանդակություն (600-ական դոլար) եւ միանվագ նպաստ (105 դոլարի կարգի): Ծրագրի 2-րդ բաղադրիչը, տների վերականգնումն է՝ սահմանամերձ բնակավայրերում շուրջ 16500 տների վերականգնում։ Սա ոչ միայն վերադարձողների համար, այլեւ նրանց, ովքեր այնտեղ ապրում են: Ծրագրով փորձելու ենք մասնակի ավերված, վթարված շենքերը վերականգնենք, ինչպես նաեւ 1694 տուն, բնակարան, որոնք ամբողջությամբ էին ավերվել, նաեւ դրանք վերականգնել: Յուրաքանչյուր ավերված տան համար նախատեսված է 7700-ական դոլար հատկացնել: Ծրագրի ընդհանուր արժեքը ավելի քան 38 միլիոն դոլար է եւ այդ գումարները նախատեսվում է ձեռք բերել միջազգային դոնոր կազմակերպություններից: Պատկան մարմիններին հանձնարարված է բանակցել դոնոր կազմակերպությունների հետ»:

Ծրագիրը կիրականացվի երեք տարում՝ յուրաքանչյուր տարի կազմակերպելով ավելի քան 300 ընտանիքի վերադարձ։