Կոտայքի մարզի ընդհանուր իրավասության դատարանում (նստավայրը Հրազդան քաղաք) Մեսրոպ Մակյանի նախագահությամբ շարունակվեց ոստիկանության Չարենցավանի բաժնում մահացած 24 ամյա Վահան Խալաֆյանի գործով դատավարությունը, որի ընթացքում ցուցմունք տվեցին լրացուցիչ դատակոչված վկաները: Մասնավորապես, ինչպես պարզվեց, ոստիկանության Չարենցավանի բաժնի քննչական բաժանմունքի պետ Արման Զարգարյանը եւ ձերբակալվածների պահման վայրի ղեկավար Հովիկ Կարապետյանը չէին հիշում, թե ով է իրենց Խալաֆյանի մահվանից անմիջապես հետո ասել, որ նա ինքն է իրեն վնասել: Առանձնապես արտառոց էր Չարենցավանի շտապօգնության բուժքույր Մարինա Աթալյանցի ցուցմունքը, որը Վահան Խալաֆյանին ոստիկանության բաժնից տեղափոխել է հիվանդանոց: Պարզվում է, վերը նշված բուժքույրը երկու տեղից դանակահարված Վահան Խալաֆյանի մարմնի վրա ոչ մարմնական վնասվածքներ, եւ ոչ էլ արյուն չի նկատել: Բուժքույրը նկատել է միայն, որ երիտասարդը անգիտակից վիճակում պառկած է եղել գետնին: Հաջորդ դատական նիստը տեղի կունենա հոկտեմբերի 1-ին:

http://armtimes.com