ՀՀ կառավարության այսօրվա նիստում ՀՀ Արդարադատության նախարար Հրայր Թովմասյանը ներկայացրեց օրենսդրական փաթեթ, որում ներառված «Հավաքների ազատության մասին» ՀՀ օրենքում, վարչական իրավախախտումների, վարչական դատավարության, քրեական օրենսգրքերում , «Երևան քաղաքում տեղական ինքնակառավարման մասին», և «Տեղական ինքնակառավարման մասին» ՀՀ օրենքների նախագծերում պետք է լրացումներ և փոփոխություններ կատարվեն: 

Փոփոխություներ են առաջարկվում նաև «Ոստիկանությունում ծառայության մասին», «Ազգային անվտանգության մարմիններում ծառայության մասին», «Դատախազության մասին» «Ոստիկանության մասին» օրենքներում:
Հ.Թովմասյանի խոսքերով, նախագծերի փաթեթի մշակման աշխատանքները սկսվել են դեռևս նախորդ տարվա սկզբներից և դրա անհրաժեշտությունը պայմանվորված է ԵԽԽՎ-ի մի շարք բանաձևերով' ոլորտում արձանագրած խնդիրներով, ինչպես նաև մարտի 1-ի իրադրաձություններն ուսումնասիրող ժամանակավոր հանձնաժողովի եզրակացության մեջ նշված միջոցառումների ցանկով: Փաթեթի մշակմանը մասնակացել են մի շարք միջազգային փորձագետներր: 

Ըստ նախարարի, օրինագծերի այս փաթեթի անհրաժեշտությունը պայմանավորված էր նաև 2005թ.-ի սահմանադրական փոփոխություններով, որից հետո հասկացությունների միասնականության ապահովման անհրաժեշտություն կար: Օրինագծերում հաշվի են առնվել այդ ոլորտում առկա խնդիրները' կապված իրազեկումների, դատական պրոսեցների, ժամկետների հետ: Ուստի, 

Հ.Թովմասյանի խոսքերով, այս փաթեթը կոչված է այս խնդիրների լուծմանը. միմյանցից տարանջատված են քաղաքական հավաքները սովորական այլ միջոցառումներից, այլ ծիսակատարություններից, «Տեղական ինքնակառավարման մասին» օրենքում էլ համապատասխան փոփոխությունները վերաբերում են այլ բնույթի հավաքների կազմակերպմանն ու անցկացմանը: Հստակ կանոնակարգված է ինչպես շտապ հավաքների, այնպես էլ ինքնաբուխ հավաքների հետ կապված հարաբերությունները, և այս ոլորտում լիազոր մարմնի և ոստիկանության լիազորությունները:

Ազգային անվտանգության ծառայության պետ Գորիկ Հակոբյանի խոսքերով էլ , այս լուրջ օրենքը չէր կարելի մեկ ժամ առաջ ուղարկել իրենց, որպեսզի դրա հիման վրա կարծիք ներկայացնեն: 

«Ինչ ներկայացվում է' անհասկանալի է: Ես հարգանքով եմ վերաբերվում Ձեր անձին, բոլոր փորձագետներին, բայց չի ընկալվում այն, որ 8-րդ կետում նշվում է, թե ազգային անվտանգության աշխատակիցները իրենց պաշտոնական պարտականությունները կատարելիս իրավունք չունեն մասնակցել հավաքներին, բայց շարունակում են մասնակցել: Հավաքներին մասնակցելիս նրանք պետք է քաղաքական չեզոքություն, զսպվածություն ցուցաբերեն: Նախ անհասկանալի է, թե ինչ է նշանակում մասնակցել: Մենք ընդհանրապես չենք մասնակցում, մասնակցել նշանակում է ելույթ ունենալ, ծափ տալ: Ներկա լինել հարցը պետք է պարզ գրվի: Եթե լինեն զանգվածային անկարգություններ, հազարավոր մահեր, մարտի 1-ին ով էր ամբողջը ֆիքսում, մենք օնլայն տալիս էինք ամբողջ ինֆորմացիան»,- նշեց Գ.Հակոբյանը: 

«Ես ենթադրում եմ, որ օրենք գրողները ընդհանրապես չեն հասկացել' ինչ են գրում: Մեր օրենքում գրված է , որ իրավունք չունենք կազմակերպել գործադուլներ, հանրահավաքներ, երթեր, ցույցեր կամ ծառայողական պարտականությունների չկատարմամբ պայմանավորված մասնակցել ցույցերի: Կոնկրետ ուզում եմ հարցի պատասխանը հասկանալ, այդ եվրոպական փորձագետները ընդունում են , որ մենք պետք է ներկա գտնվենք, թե' ոչ»,- ընդգծեց ԱԱԾ պետը: 

Հ.Թովմասյանը նկատեց, որ պետք չի միջազգային փորձագետներին և իրավաբաններին մատնանշել, խորհուրդ տվեց  ՀՀ Սահմանադրությունը կարդալ' մասնավորապես 29-րդ հոդվածը, որտեղ խոսքը գնում է միայն համապատասխան ծառայություններում ծառայողների իրավունքների սահնափակման մասին, այլ ոչ թե արգելման մասին: 
Նշենք, որ նախարարի պարզաբանման ժամանակ Գ. Հակոբյանը շարունակում էր բարձրաձայն դժգոհել, այնուհետև միկրոֆոններն անջատվեցին, ապա միջամտեց ՀՀ վարչապետ Տիգրան Սարգսյանը:

Նա նշեց, որ օրենքում կան հոդվածներ, որոնք անհրաժեշտ են խմբագրել. ԱԱԾ-ի պետին ասաց, որ միասին կաշխատեն, նրա բարձրացրած հարցը կդառնա քննարկման առարկա: Այնուհետև կներկայացնեն ԱԺ:
«Իհարկե՝ այս նախագիծն ունի լուրջ քաղաքական բովանդակություն, սրա վրա նաև միջազգային փորձագետներն են աշխատել, որպեսզի այն համապատասխանի միջազգային պարտավորություններին, և մենք պարտավոր ենք փոփոխություններն ու շտկումները կատարել, ինչը բխում է միջազագային իրավունքների ստանդարտներից»,- ասաց Տ. Սարգսյանը:

Աղբյուր` www.panorama.am