Ժառանգություն կուսակցության ներկայացուցիչները շարունակում են տարբեր բողոքի ակցիաների միջոցով բարձրաձայնել իրենց համակուսակից Զարուհի Փոստանջյանի եղբոր՝ Տիգրան Փոստանջյանի կալանավորման հարցով, ում, պաշտոնական վարկածով, ձերբակալել են 100,000 դրամ կաշառք վերցնելու մեղադրանքով, և այժմ նա գտնվում է Նուբարաշենի քրեակատարողական հիմնարկում:

Մարտի 11-ին Ազգային անվտանգության ծառայության շենքի առջև կազմակերպված հերթական պիկետի ժամանակ թվով մոտ 70 Փոստանջյանի աջակիցները շարունակում էին պնդել, որ ՀՀ քրեական օրենսգրքի համաձայն (190-րդ հոդված) կաշառք ստանալու փաստով քրեական գործի վարույթը պետք է վարեն ՀՀ Ոստիկանության քննիչները, և ոչ թե ԱԱԾ քննիչները, իսկ ձերբակալելու համար 135-րդ հոդվածի համաձայն մեղադրյալին կարելի է կալանավորել, միայն եթե իրականվտանգ կա, որ նա կխոչընդոտի արդարադատությանը, կամ կկատարի հանցագործություն:

Պիկետի մասնակիցներին ոստիկանները չթողեցին մոտենալ շենքին՝ նշելով, որ նրանք խանգարում են ԱԱԾ աշխատակիցներին աշխատել, չնայած ՀՀ ժողովներ, հանրահավաքներ, երթեր և ցույցեր անցակացնելու մասին օրենքի համաձայն կարող էին փոքրաթիվ մարդկանցով պիկետ անցկացնել: Պիկետի մասնակիցները չփորձեցին անցնել փողոցը և այս անգամ բախումներ չեղան ոստիկանների հետ, ինչպես նախորդ շաբաթ ՀՀ կառավարության շենքի առջև՝ նիստից հետո:

Տիգրան Փոստանջյանին մինչև այսօր կարողացել են տեսնել միայն փաստաբանները և Ժառանգություն խմբակցության 3 պատգամավորներ, իսկ քրոջը՝ Զարուհի Փոստանջյանին, հատուկ հրահանգով չեն թողնում այցելել եղբորը:

Փոստանջյանը համոզված է, որ եղբորը ձերբակալել են իր քաղաքական ակտիվությունը ճնշելու համար, իսկ այժմ պահում են Նուբարաենի քրեկատարողական հիմնարկում, որտեղ գերբեռնված պայմաններ են, որ կարողանան այդպես ազդել իր եղբոր վրա:

«Այսպիսի գործերը ԱԱԾ մակարդակի գործ չեն, մեկը մյուսի հետևից ոտնահարում են մարդու իրավունքները, սահմանադրական իրավունքները, և մինչև անգամ ու այս գործը դարձրել են մի խնդիր, որով ուզում են ցույց տալ, որ «մեզ համար և մեր դեմ խաղ չկա»: Ես դեմ եմ, որ ԱԱԾ-ն գործի միայն ներքին խնդիրների օգտագործման և քաղաքական կարծիքների հետապնդման համար»,- ասում է նախկին մարդու իրավունքենրի պաշտպաններից Լարիսա Ալավերդյանը:

Կարինե Իոնեսյան
Աղբյուրը՝ www.hra.am