Փաստաբանների պալատը (ՓՊ) երեկ քննարկում էր կազմակերպել՝պատվին, արժանապատվությանը կամ գործարար համբավին պատճառված վնասի հատուցման քաղաքացիական գործով դատական ծախսերի մեջ ներառող փաստաբանի ողջամիտ վարձատրությունը որոշելու շուրջ։ ՓՊ-ն այսօր արդեն կայացրել է որոշում՝ այս հոդվածով գործերի փաստաբանական ծախսի փոխհատուցումը  չի կարող գերազանցել կես միլիոն դրամը:

Վիրավորանքի և/կամ զրպարտության միջոցով արատավորված պատվի և արժանապատվության  փաստաբանական պաշտպանության փոխհատուցման պահանջը չի կարող գերազանցել 200 հազար դրամը, իսկ վիրավորանքի և/կամ զրպարտության միջոցով արատավորված գործարար համբավի պաշտպանության փոխհատուցման պահանջը՝ 300 հազար դրամը։

Հիշեցնենք, որ 2010թ. մայիսին վիրավորանքի և զրպարտության հոդվածները ապաքրեականացվելուց հետո, բազմաթիվ են հատկապես ԶԼՄ-ների դեմ այս հոդվածով դատավարությունները, որոնցում փաստաբանական ծախսի փոխհատուցման գումարը երբեմն հասնում է մի քանի միլիոն դրամի։