Քաղաքացիական հասարակության ինստիտուտ ՀԿ աշխատակից Իսահակ Խաչատրյանը,
ով ՀՀ մարդու իրավունքների պաշտպանին առընթեր խոշտանգումների կանխարգելման փորձագիտական
խորհրդի անդամ է, 2012թ. հունիս–դեկտեմբեր ամիսների ընթացքում 20–ից ավելի արագ արձագանքում
է ունեցել։ Պաշտպանի 116 թեժ գծին ստացված ահազանգերի հիման վրա ՄԻՊ գրասենյակի աշխատակցի
հետ նա այցելել է ոստիկանության բաժիններ կամ քրեակատարողական հիմնարկներ։

Հիշեցնենք, որ ՄԻՊ գրասենյակը 9 հասարակական կազմակերպությունների
համագործակցությամբ, որոնց թվում նաև Քաղաքացիական հասարակության ինստիտուտն է, 2011թ.
նոյեմբերի 1-ից վերաբացել
է իր արագ արձագանքման ծառայությունը։

«Ամփոփելով իմ կողմից կատարված արձագանքումները՝ կարող եմ ասել,
որ դրանց մեծ մասը վերաբերել է մարդկանց օրենքի խախտմամբ ոստիկանության բաժին տանելուն
և առանց հիմքի ու իրավունքների մասին տեղեկացնելու ժամեր շարունակ այնտեղ պահելուն»,–
ասում է Իսահակ Խաչատրյանը։

Նա նշում է դեպքեր, երբ մարդիկ, առանց իրավական կարգավիճակի,
ժամեր շարունակ պահվել են ոստիկանության բաժնում և չեն տեղեկացվել, որ 3 ժամ անց իրավունք
ունեն դուրս գալու։

«Երբ պահանջում էինք ցույց տալ ոստիկանության բաժին բերման ենթարկվածների
հաշվառման գրանցամատյանը, որպեսզի պարզենք, թե անձը երբ է բերվել բաժին, եղել են դեպքեր,
երբ հրաժարվել են ցույց տալ կամ բերել են ուշացումով, ինչից կարելի է ենթադրել, որ
բերման ենթարկելու ժամը լրացրած չեն եղել»,– հավելում է Խաչատրյանը։

Հոկտեմբերի 24-ին 116 թեժ գծին ահազանգել է մի կին՝ հայտնելով,
որ Ոստիկանության Կենտրոն բաժնի աշխատակիցներն իր ամուսնուն տարել են ոստիկանություն,
որպեսզի պարզեն որդու գտնվելու վայրը, և պահում են այնտեղ։ «Գրանցամատյանում արձանագրված
չէր քաղաքացուն բաժին բերելու փաստը։ Մենք առանձին զրուցեցինք քաղաքացու հետ, բացատրեցինք
իր իրավունքները, մասնավորապես՝ որ կարող է դուրս գալ ոստիկանությունից, եթե ցանկանում
է, որից հետո նա ասաց, որ ցանկություն չունի մնալու և մեզ հետ դուրս եկավ բաժնից»,–
պատմում է արագ արձագանքման խմբի անդամը։

Ոստիկանություն բերման ենթարկելու և այնտեղ ժամեր շարունակ անհիմն
պահելու վերաբերյալ ահազանգ է եղել նաև նոյեմբերի 21-ին։ Այս անգամ Ոստիկանության Երևան
քաղաքի վարչության Մաշտոցի բաժին բերման ենթարկվածները երեքն էին։ «Մենք առանձին զրուցել
ենք քաղաքացիների հետ և պարզել, որ նրանց անհիմն են պահում անազատության մեջ։ Մեր միջամտությամբ
նրանց ազատ են արձակել, սակայն նրանք հետագայում հրաժարվել են պաշտպանին գրավոր բողոք
ներկայացնելուց»,– նշում է Իսահակ Խաչատրյանը։

Նրա խոսքերով՝ արագ արձագանքման
թեժ գծին հիմնականում զանգահարում են բերման ենթարկվածների ընտանիքի անդամները, հարազատները։
Իսկ քրեակատարողական հիմնարկներում պահվողների վերաբերյալ ահազանգերը և բողոքները ավելի
շատ եղել են անձնական գործերի վերանայման, արդար դատավարության իրավունքի հետ կապված։