28 ապրիլի 2010

ԵԽ մարդու իրավունքների հանձնակատար
Պարոն Թոմաս Համարբերգին

Մարդու իրավունքների եւ իրավական հարցերով հանձնաժողովի նախագահ
Պարոն Քրիստոս Պուրգուրիդեսին

Կրթության, գիտության եւ մշակույթի հարցերով հանձնաժողովի նախագահ
Պարոն Էնդրյու Մըքինթոշին

ԶԼՄ-ների ենթահանձնաժողովի նախագահ
Պարոն Մարկու Լուկկանեն

Մոլդովայի պատվիրակոիթյան ղեկավար
Տիկին Աննա Գուտու

Հարգելի գործընկերներ,

Սույն դիմում-խնդրանքը վերաբերվում է չճանաչված  Մերձդնեստրյան հանրապետության տարածքում կալանավորված անկախ լրագրող Էռնեստ Վարդանյանի ոտնահարված իրավունքներին:

Էռնեստ Վարդանյանը ծնվել է 1980 թ. մայիսի 11-ին, Գյումրի քաղաքում (նախկինում՝ Լենինական): Նրա ընտանիքը տեղափոխվել է Խորհրդային Մոլդովական Հանրապետության Տիրասպոլ քաղաք' 1988 թ. Սպիտակի ավերիչ երկրաշարժից հետո, որի ժամանակ նրանք կորցրել են բնակարանը: Վարդանյանը միջնակարգ կրթությունը ստացել է Տիրասպոլում, այնուհետև ընդունվել Մոլդովայի պետական համալսարան՝ ստանալով քաղաքագետի որակավորում: Վերադառնալով Տիրասպոլ՝ նա աշխատանքի է անցել ՙՕլվիա-պրեսս՚ տեղեկատվական կազմակերպությունում  որպես լրագրող, զուգահեռ' իր օրվա հացը վաստակելով նաև թարգմանություններով (էռնեստ Վարդանյանը տիրապետում է վեց լեզուների): ՙՕլվիա-պրեսս՚ գործակալությունից Է. Վարդանյանը տեղափոխվել է ռուսական ՙ«Նովիյ ռեգիոն՚» տեղեկատվական գործակալություն, որտեղ աշխատել է  մինչև 2008 թ., որից հետո աշխատել է որպես թարգմանիչ, ազատ լրագրող՝ աչքի ընկնելով իր համարձակ հրապարակումներով: 2009 թ. դիմելով թափուր տեղի համար ՄԱԿ-ի հայտարարած մրցույթին՝ անցել է անհրաժեշտ քննություններն ու ընդունվել աշխատանքի, և ապրիլ ամսին սպասում էր իր նշանակմանը, որի պատճառով տեղափոխվելու էր ԱՄՆ:

Համաձայն Էռնեստ Վարդանյանի հարազատների դիմումի' Մերձդնեստրյան պետանվտանգության ծառայողները  2010 թ. ապրիլի 7-ին Էռնեստ Վարդանյանին կալանավորել են. նրան  մեղադրում են «պետական լրտեսություն իրականացնելու մեջ, որը, ըստ Մերձդնեստրյան Քրեական Օրենսգրքի 271 հոդվածի' նախատեսում է 12-20 տարի ազատազրկում: Մեղադրանքը զուրկ է որևէ հիմնավոր կասկածից:

Փակ դռների հետևում կայացած դատը, որին ներկա չեն եղել ոչ մեղադրյալը, ոչ իր պաշտպանը, որոշում է կայացրել երկարաձգել կալանքը վաթսուն օրով: Ձերբակալված Էռնեստ Վարդանյանին թույլ չեն տալիս վարձել իր փաստաբանին՝ տրամադրելով միայն պետական պաշտպան, որին նրա ընտանիքը ոչ ճանաչում է, ոչ էլ կարող է վստահել: Էռնեստ Վարդանյանի շահերը ներկայացնող փաստաբանին թույլ չեն տալիս նրան տեսակցելու կամ գործին ծանոթանալու: 

Ընտանիքը չունի որևէ տեղեկություն Էռնեստի առողջական վիճակի և նրա վրա գործադրվող ճնշումների մասին: Զրկված լինելով նրա հետ հաղորդակցվելու որևէ հնարավորությունից, նույնիսկ միջնորդավորված՝ պաշտպանի միջոցով, ընտանիքի անդամներն անհանգստանում են նրա ոչ միայն առողջության, այլև կյանքի համար:

Սպառելով տեղական իրավապահ և անվտանգության մարմիններից որևէ բացատրություն կամ հիմնավորում ստանալու բոլոր հնարավորությունները, Էռնեստ Վարդանյանի մայրը՝ Թամարա Շագոյանը, դիմել է  ինձ' խնդրելով աջակցել, որպեսզի   Մերձդնեստրյան իշխանությունները գործը վարեն Մարդու իրավունքների և հիմնարար ազատությունների պաշտպանության միջազգային նորմերի շրջանակներում:

Հիմք ընդունելով վերոգրյալը և հաշվի առնելով այն փաստը, որ թեպետ Մերձդնեստրյան հանրապետությունը չի հանդիսանում միջազգային իրավունքի սուբյեկտ և չի միացել Մարդու իրավունքների և հիմնարար ազատությունների մասին եվրոպական կոնվենցիային, այնուամենայնիվ' գտնում եմ, որ շտապ անհրաժեշտություն է ծագել հնարավորինս կանխելու և վերացնելու  մարդու իրավունքների ոտնահարումը' կապված Էռնեստ Վարդանյանի գործի հետ' օգտագործելով  Եվրոպայի Խորհրդի իրավասության ներքո գտնվող միջոցները:

Զարուհի Փոստանջյան

ԵԽԽՎ-ում Հայաստանի պատվիրակության անդամ
Եվրոպայի ժողովրդական կուսակցության խմբի անդամ/
Հայաստանի Հանրապետություն