«Գերագույն խորհուրդ–պատգամավորական ակումբ» հասարակական կազմակերպությունը անդրադառնալով ՀՀ ԱԺ կրթության, գիտության, մշակույթի եւ երիտասարդության հարցերի հանձնաժողովի նախագահի պաշտոնում հանրապետական Արմեն Աշոտյանի նշանակմանը, հայտարարում է.

«Երեկ, զինվորական ծառայություն չանցած հերթական ՀՀԿ-ականը, ՀՀ օրենսդրության պահանջների («Զինապարտության մասին» ՀՀ օրենքի 30 հոդվածի 4-րդ մասի պահանջներ) կոպիտ խախտումներով նշանակվեց ԱԺ հանձնաժողովի նախագահ:

Թե ինչ են սովորելու այդ օրինախախտումից մեր երկրի երիտասարդները` դժվար չէ կռահել:

Մնում է միայն հասկանալ, թե ինչու՞ են այսօր բարձրաստիճան պաշտոններում հայտնվում, հիմնականում, այդ կարգավիճակի տեր անձինք:

Մասնավորապես, այդպիսին են` ԱԺ Նախագահը, Վարչապետը, ՍԴ նախագահը և որոշ անդամներ, ՎԴ նախագահը, ԿԲ նախագահը, Երևանի քաղաքապետը, Կառավարության անդամների գերակշռող մասը, գլխավոր դատախազը, ինչպես նաև, երկրի «համարյա 4-րդ» բարձրաստիճան պաշտոնյան` ԱԽՔ-ը և այլն:

Հիշեցնենք նաև, որ այդ հարցով խնդիրներ էին ծագել նաև ՀՀԿ առաջնորդի մոտ։