Սահմանադրական կարգի խախտմամբ պետական իշխանությունը յուրացնելու նպատակով Երեւանում զանգվածային անկարգություններ հրահրելու եւ կազմակերպելու առթիվ Հատուկ քննչական ծառայության վարույթում քննվող քրեական գործի շրջանակներում կալանավորված մոտ 3 տասնյակ մարդ հացադուլ է հայտարարել:
Այս անձինք պահվում են երեք քրեակատարողական հիմնարկներում:

Հայաստանի արդարադատության նախարարության քրեակատարողական վարչության հաղորդագրության համաձայն, ապրիլի 2-ի ժամը 13:00-ի դրությամբ հացադուլ հայտարարելու դիմումներ են ներկայացրել 29 կալանավորվածներ եւ դատապարտյալներ, մեկը` Ալեքսան Վարդանյանը, հայտնել է հացադուլից դուրս գալու մասին:
Հացադուլ հայտարարածների թվում են Ազգային ժողովի պատգամավորներ Մյասնիկ Մալխասյանը եւ Սասուն Միքայելյանը: Մարտի 24-ից Նուբարաշեն հիմնարկում հացադուլի մեջ է Հանրապետություն կուսակցության քաղխորհրդի անդամ Սուրեն Սուրենյանցը: Նույն հիմնարկում այսօրվանից նրան է միացել եւս 14 կալանավորված:

Երեւան-Կենտրոն քրեակատարողական հիմնարկում այսօր հացադուլ հայտարարած 10 կալանավորվածների թվում են Լեւոն Տեր-Պետրոսյանի նախընտրական շտաբի նախկին ղեկավար Ալեքսանդր Արզումանյանը, Հայոց համազգային շարժման վարչության նախագահ Արարատ Զուրաբյանը, խորհրդարանի նախկին փոխխոսնակ Կարապետ Ռուբինյանը, ազգային անվտանգության նախարարի նախկին տեղակալ Գուրգեն Եղիազարյանը եւ այլոք:

4 կալանավորվածներ հացադուլի մասին հայտարարություն են տվել Վարդաշեն քրեակատարողական հիմնարկում:

Հացադուլ հայտարարած կալանավորները նշել են <Եթե անհապաղ չվերանայվեն մեզ մեղսագրված հանցագործությունները, մենք` քաղաքական բանտարկյալներս, ապրիլի 2-ից մեկօրյա հացադուլ ենք հայտարարելու, իսկ ապրիլի 9-ից` անժամկետ>: