ՀՀ գլխավոր դատախազ Աղվան Հովսեփյանի եւ ՀՀ նախագահի ընտրություններում ԱՊՀ դիտորդական առաքելության պատվիրակությանը՝ ԱՊՀ գործադիր կոմիտեի նախագահի առաջին տեղակալ Վլադիմիր Գարկունի հանդիպման ժամանակ գլխավոր դատախազը հույս է հայտնել, որ 2007 թվականի խորհրդարանական ընտրությունների ժամանակ ընտրողների կամքի ազատ իրականացմանը խոչընդոտելու, քվեարկության արդյունքները կեղծելու համար ձեւավորված պատժողական քաղաքականությունը կանխարգելիչ դեր կխաղա: Աղվան Հովսեփյանը հյուրին տեղեկացրել է, որ դատախազությունում արդեն իսկ ձեւավորվել է աշխատանքային խումբ՝ Հայաստանի Հանրապետության Նախագահի 2008թ. փետրվարի 19-ին կայանալիք ընտրությունների ընթացքում իրավախախտումների վերաբերյալ հաղորդումների քննարկման նկատմամբ դատախազական հսկողության արդյունավետությունը բարձրացնելու, Հայաստանի Հանրապետության դատախազության գործունեությունը համակարգելու նպատակով: Բացի այդ՝ գրություններ են ուղարկվել ՀՀ հատուկ քննչական ծառայության պետին եւ ՀՀ ոստիկանության քննչական գլխավոր վարչության պետին՝ քննչական առանձին խմբեր ձեւավորելու առաջարկությամբ:

Բարձր գնահատելով ձեւավորված փորձը եւ արդեն իսկ կատարված աշխատանքը՝ Վլ.Գարկուն տեղեկացրել է, որ դիտորդական առաքելությունը բազմանդամ է. առաքելության կազմում ընդգրկվել է շուրջ 150 դիտորդ եւ նախատեսում են փետրվարի 19-ին քվեարկության ընթացքին հետեւել ընտրատեղամասերի շուրջ 70 տոկոսում: «Ներքաղաքական զարգացումներին միջամտելու որեւէ ցանկություն չունենք», - հավաստել է Վլադիմիր Գարկուն՝ ընդգծելով, որ ընտրական գործընթացի գնահատականը կտան իրենց դիտորդների անկողմնակալ եւ օբյեկտիվ դիտարկումների հիման վրա: