Իրավապաշտպան Պուշկին Սերոբյանը, ՀՀ կառավարության ազգային փոքրամասնությունների հարցերի վարչության պետ Հրանուշ Խառատյանը, «Շանթ» հետուստաընկերության տնօրեն Արթուր Եզեկյանը ՀՀ տարբեր դատարաններ դիմումներ են ներկայացրել ընդդեմ «Ժամանակ Երեւան» թերթի` բողոքելով կամ իրենց անհամաձայնությունը հայտնելով թերթում իրենց մասին հրապարակումներից: Դիմումները ներկայացվել են ուշացումով:

«Ժամանակ Երեւանի» խմբագիր Արմինե Օհանյանը հայտնեց, որ «Ժամանակ Երեւանի» դեմ դիմումների հետ կապված աշխատանքը իրավապահ մարմիններում ակտիվացել է 2007 փետրվարից: Դատախազությունը նախ թերթին տեղեկացրել է, որ Պուշկին Սերոբյանը համաձայն չէ այն հրապարակման հետ, ուր ԳԱԱ որոշ ակադեմիկոսներ թերթին ասել են, որ Պուշկին Սերոբյանը ԳԱԱ ինստիտուտներից մեկից հող է խլել: Հոդվածը լույս է տեսել 2006-ի հունիսին, Պուշկին Սերոբյանը իրավապահներին է դիմել 2006-ի աշնանը, նրանք էլ դիմումին ընթացք են տվել 2007-ի ձմռանը:

ՀՀ կառավարության ազգային փոքրամասնությունների հարցերի վարչության պետ Հրանուշ Խառատյանը դժգոհ է թերթի այն հոդվածից, ուր նշված է, թե նա փորձում է տիրանալ Նորքի Զանգվածում գտնվող մի փռի, որը այս պահին մի ընտանիքի կացարան է ծառայում: Այս մասին թերթերը գրել են սկսած 2004 թվականից: «Ժամանակ Երեւանը» այս մասին գրել է մի 3 ամիս առաջ, ու Հրանուշ Խառատյանը որոշել է դատարան ու դատախազություն դիմել հենց «ժամանակ Երեւանի» գրածի համար, թեեւ դա ընդամենը ողջ երեք տարիների գրածի ամփոփում է: «Ես լինելով «Հայկական ժամանակ» օրաթերթի լրագրող, տասնյակ հոդվածներ եմ գրել այդ փռի մասին, ոչ մի անգամ Հրանուշ Խառատյանը չի արձագանքել», տեղեկացրեց Արմինե Օհանյանը:

Երրորդ դիմողը «Շանթ» հետուստաընկերության տնօրեն Արթուր Եզեկյանն է: Արթուր Եզեկյանը մեկ դիմումով չի սահմանափակվել: «ժամանակ Երեւանը» գրել է, թե Արթուր Եզեկյանը «Ռոտարի» ակումբի հետ կապ ունի, մասոն է: Հետո «ժամանակ Երեւանը» տպագրել է հերքումը, սակայն սեփական վերնագրով: Սա Արթուր Եզեկյանին չի գոհացրել, եւ նա երկրորդ հերքումն է պահանջել: Սա էլ է տպվել, բայց «ժամանակ Երեւանը» հերքման կողքին գրել է, որ Արթուր Եզեկյանը մասոն չի, այլ` «իշխանությունների ձեռքին գործիք»: Արթուր Եզեկյանը փորձում է գործարար համբավը պաշտպանել տնտեսական դատարանում: