Եվրախորհրդի Խորհրդարանական վեհաժողովը երեկ հորդորել է Թուրքիային վերացնել Քրեական օրենսգրքի 301-րդ հոդվածը, որով պատիժ է սահմանվում «թուրքական ինքնությունը վիրավորելու» համար:

«Այս հոդվածի գոյությունը, որը իրավաբանորեն սահմանափակում է արտահայտվելու ազատությունը, միայն խրախուսում է իրավական եւ այլ տեսակի հարձակումները լրագրողների վրա»,- ասված է ընդունված բանաձեւում:

301-րդ հոդվածով պայմանական ազատազրկման էր դատապարտվել «Ակոս» թերթի խմբագրապետ Հրանտ Դինքը, որն անցած շաբաթ սպանվեց Ստամբուլում:

Նախօրեին Թուրքիայի արտգործնախարար Աբդուլա Գյուլը հայտարարել է, որ հավանություն է տալիս օրենքը փոխելու գաղափարին: