Երկուշաբթի օրը Հայաստանի հանրային ծառայությունները կարգավորող հանձնաժողովը
որոշել է խմբագրական փոփոխություն կատարել «ԱրմենՏել»-ի թիվ 60 լիցենզիայի մեջ`
ընկերությունը զրկելով ինտերնետ կապի ելքի մենաշնորհից, ինչպես նաեւ տվյալների ու
ծառայությունների միջազգային փոխանցման ոլորտում ձայնային կապի փոխանցման բացառիկ
իրավունքից:

«Այժմ արդեն ինտերնետի մենաշնորհ ասածը, որ այսքան ժամանակ շահարկվում էր, այլեւս «ԱրմենՏել»-ի
մենաշնորհը չէ: Այսինքն՝ յուրաքանչյուր ինտերնետ մատակարարող ընկերություն իրավունք
ունի միջազգային ինտերնետի իր ելքը ունենալ», - «Ազատություն» ռադիոկայանին ասաց «ԱրմենՏել»-ի
քաղաքականության եւ կարգավորման հարցերով տնօրեն Հայկ Ֆահրամազյանը:

Ինչ վերաբերում է ձայնային կապի ծառայությունների բացառիկ իրավունքին, ապա, ըստ նրա,
նախկինում «ՎիվաՍել»-ը իր միջազգային կապը ապահովում էր «ԱրմենՏել»-ի միջազգային
կայանների միջոցով: Այժմ «ՎիվաՍել»-ը իրավունք ունի սեփական միջազգային կայանների
միջոցով իր բաժանորդներին տրամադրել միջազգային կապ, ծառայություններ:

Նիստում «ԱրմենՏել» եւ Հայաստանում բջջային կապի երկրորդ օպերատորին՝ «ՎիվաՍել»
ընկերությանը, հանձնարարվել է որոշման հետ կապված մինչեւ 2007 թվականի փետրվարի 1-ը
հանձնաժողովի հաստատմանը ներկայացնել միջազգային ձայնային կապի ծառայությունների
փոխադարձ մատուցման պայմանագիրը:

Հայկ Ֆահրամազյանը նաեւ հաստատեց, թե նշված փոփոխությունները արվել են «ԱրմենՏել»-ի
բաժնետոմսերի 90 տոկոսի սեփականատեր ռուսաստանյան «ՎիմպելԿոմ» ընկերության՝
հեռահաղորդակցության ոլորտի մենաշնորհից աստիճանաբար հրաժարվելու մտադրության մասին
հայտարարության հիման վրա:

«Դա արվել է «ԱրմենՏել»-ի սեփականատիրոջ փոփոխությունից հետո՝ սեփականատիրոջ
մտադրություններից ելնելով: Նախատեսվում է, որ մինչեւ հաջորդ տարվա նոյեմբեր «ԱրմենՏել»-ը
զրկվելու է թիվ 60 լիցենզիայով նախատեսված բոլոր մենաշնորհներից», - ասաց նա:

Հարցին, թե ի՞նչ ազդեցություն կունենան այդ որոշումները միջազգային կապի
ծառայությունների որակի եւ սակագների վրա, Ֆահրամազյանը պատասխանեց, թե միջազգային
կապի առումով «ՎիվաՍել»-ի հետ կստեղծվեն մրցակցային հարաբերություններ, իսկ «մնացած
ինտերնետի մասը արդեն ամբողջությամբ ազատականացված է». - «Ես համոզված չեմ, թե
որակը կլավանա, միգուցե ընդհակառակը՝ կվատանա: Իսկ գների առումով, իհարկե,
մրցակցային շուկա է ստեղծվում»:

«ԱրմենՏել»-ի ներկայացուցչի հետ, սակայն, համաձայն չէ Հանրային ծառայությունները
կարգավորող հանձնաժողովի անդամ Սամվել Արաբաջյանը. - «Ակնկալում եմ, որ ե’ւ գների
անկում կլինի, ե’ւ որակի բարձրացում կլինի` միանշանակ, քանի որ սա մրցակցության՝
մեր ակնկալած արդյունքներն ու հետեւանքներն են»:

Ռուբեն Մելոյան