«Հայաստանի Հանրապետությունում չի ճանաչվում եւ չի պաշտպանվում սեփականության
իրավունքը» կարգախոսով եւ պաստառներով այսօր Երեւանի քաղաքապետարանի շենքի մոտ
Բուզանդ փողոցի հինգ ընտանիքները բողոքի ակցիա էին կազմակերպել:

«Օրերս մեզ պայմանագիր է եկել, որ ստորագրենք դրա տակ, իսկ եթե ոչ, ապա փետրվարի
14-ից հետո սպասենք վտարման: Փողոցում որ հայտնվենք ինչպե՞ս ենք ապրելու»,- ասում է
Բուզանդի 15 բակի 19 տան բնակչուհի Սուսաննա Պողոսյանը:

Այսօր բյուզանդցիները պատրաստվում էին դիմում ներկայացնել քաղաքապետին, որում
ներկայացնում են իրենց հետ կատարված անօրինությունները եւ խնդրում, որ իրենց
նկատմամբ կատարված անօրինություններն արդարացի լուծում ստանան: Ի պատասխան դիմումի`
այսօր նրանց ընդունեց Երեւանի քաղաքապետի տեղակալ Կարեն Դավթյանը, որն, ի դեպ,
զգալի լումա ունի Բուզանդի կառուցապատման գործում եւ փոխքաղաքապետի աթոռին
տեղափոխվեց ուղիղ «Երեւանի կառուցապատման ներդրումային ծրագրերի իրականացման
գրասենյակ»-ի տնօրենի աթոռից: Ընդունելով Բուզանդ փողոցի բնակիչներին` նա «գործը»
հետաձգեց մինչեւ փետրվարի 15-ը: Այսինքն` ուղիղ այն օրը, երբ ԴԱՀԿ աշխատակիցները
կարող են քաղաքացիներին պարզապես վտարել իրենց տներից:

Բուզանդցիները վերջին օրերին նորից նամակներ են հղել տարբեր ատյանների՝ Ազգային
ժողով, Բելլա Քոչարյանին, սակայն նամակների պատասխանը եւ խնդրի լուծում առայժմ այդ
մակարդակով էլ չկա: