«Ընտրությունն քոնն է» հասարակական կազմակերպության դիտորդները արձանագրել են «լուրջ
խախտումներ»

Ընտրությունները դիտարկող հայաստանյան ամենախոշոր՝ «Ընտրությունը քոնն է»
կազմակերպության գնահատականով, նոյեմբերի 27-ին արձանագրված լուրջ խախտումները,
անօրինական քվեարկության բազմաթիվ դեպքերը, լցոնումները, ինչպես նաեւ
հանձնաժողովների կողմից օրենքը շրջանցելու դիտավորությունը թույլ չեն տալիս
սահմանադրական փոփոխությունների հանրաքվեի ընթացքը գնահատել որպես ժողովրդավարական
եւ միջազգային չափանիշների համապատասխանող:

Կազմակերպության նախագահ Հարություն Համբարձումյանը ընտրակարգի խախտման բազմաթիվ
փաստեր ներկայացրեց տեղական դիտորդների կազմած 12 էջանոց զեկույցից:

Կազմակերպության դիտորդները արձանագրել են, որ մի շարք տեղամասերում ընտրողները
քվեարկել են ուրիշի անձնագրերով, սոցիալական քարտերով, խորհրդային նմուշի եւ
արտասահմանյան անձնագրերով եւ նույնիսկ անձնագրային բաժնի պետի ստորագրությամբ տված
տեղեկանքներով:

Մի շարք տեղամասերում հանձնաժողովների անդամներն իրենք են խախտել օրենքն ու
ցուցակներում ստորագրություններ ավելացնելով՝ լցոնումներ կատարել: Ընդհանուր առմամբ,
Հարություն Համբարձումյանի գնահատմամբ, նոյեմբերի 27-ին լցոնումների թիվն ավելի շատ
է եղել, քան 2003 թվականի նախագահական ընտրությունների ժամանակ:

Դիտորդները արձանագրել են նաեւ, որ հանձնաժողովների մեծ մասն աշխատել է լրիվ կազմով,
մինչդեռ հանձնաժողովների նախագահները այդպես էլ չեն կարողացել պատասխանել
դիտորդների հարցին, թե ովքեր են «Արդարության» եւ «Ազգային միաբանության»
ներկայացուցիչները: Հարություն Համբարձումյանի գնահատմամբ, ընտրական
հանձնաժողովների աշխատանքները բոյկոտող անդամները հավանաբար լրացվել են այլ՝ նշված
խորհրդարանական խմբերը չներկայացնող անդամներով, ինչը եւս օրենքի խախտում է:

«Չնայած տեղամասերում տիրող թվացյալ խաղաղ եւ հանգիստ մթնոլորտին, մեր 4000
դիտորդները աշխատել են բավական լարված իրավիճակում», - ասաց «Ընտրությունը քոնն է»
կազմակերպության նախագահը: - «Ավելի քան 10 ընտրատեղամասերում հանձնաժողովի
անդամները խախտել են օրենքն ու դիտորդներին հնարավորություն չեն տվել իրանակացնել
իրենց պարտականությունները»:

Հարցին, թե արդյո՞ք նշված խախտումները կարող էին ազդել հանրաքվեի վերջնական
արդյունքի վրա, Հարություն Համբարձումյանը պատասխանեց. - «Դրանք, իհարկե, ազդել են
հանրաքվեի արդյունքների վրա: Թե որքանով՝ թող որոշի Կենտրոնական ընտրական
հանձնաժողովը»:

Հայաստանի առաջադիմական կուսակցությունը, մինչդեռ, այսօր հայտարարեց, որ հանրաքվեն
կազմակերպվել եւ ընթացել է այնպիսի օրինակելիությամբ, որը նախանձելի պիտի լինի ե'ւ
տարածաշրջանի, ե'ւ բազմաթիվ այլ երկրների համար:

Հարկ է նշել, որ կուսակցությունը այս եզրակացությանը հանգել է դիտորդական
առաքելություն իրականացնելով հանրապետության ընդամենը 53 ընտրատեղամասերում:
Կուսակցության առաջնորդ Տիգրան Ուրիխանյանը նշեց, որ իրենց եզրակացությունը չի
տարածվում մնացած ավելի քան հազար տեղամասերում անցած քվերակության վրա, որ ինքը
վերապահումով է վերաբերում մասնակցության թվերին: Ուրիխանյանը, այդուամենայնիվ,
վստահ է, որ հանրաքվեի արդյունքները չի կարելի կասկածի տակ առնել:

Հեղինե Բունիաթյան