Այսօր Կառավարության շենքի մոտ իրենց բողոքի ակցիան էին շարունակում Հյուսիսային եւ Գլխավոր պողոտաների բնակիչները, Դալմայի այգետերերը եւ ընդդեմ մարդկային համարակալման մի շարք քաղաքացիներ:

"Երկու տարի է պահանջում ենք արդարություն. կամ բնակարան, կամ համապատասխան գումար, որ տուն կարողանանաք գնել"՚,- ասում էր ցուցարարներից մեկը: Ակցիայի մասնակից Մարիամ Բաբայանը ավելացնում է."Մեզ վիրավորված եւ ոտնահարված ենք զգում: Սահմանադրության մեջ առաջին կետը ասված է, որ մարդ իր իրավունքները պետք է պաշտպանի, բայց մենք բոլորովին անպաշտպան ենք":

Հիշեցնենք, որ Հյուսիսային եւ Գլխավոր պողոտաների բնակիչները պահանջում են արդարացի փոխհատուցում իրենց բնակարանների դիմաց, Դալմայի այգետերերը` հողի դիմաց, իսկ Հայ Առաքելական Եկեղեցու հետեւորդները պահանջում են վճարել իրենց կենսաթոշակներն ու աշխատավարձերը առանց սոցիալական քարտեր վերցնելու:

Ցուցարարներն այսօր ինչպես միշտ անուշադրության մատնվեցին. կառավարությունից որեւէ մեկը նրանց չլսեց: "Այսօր ոտնահարում են մարդու իրավունքները: Մարդկանց տներից վտարում են, գալիս տեսնում ենք տունը քանդված: Մենք բոլորս միավորվել ենք եւ պայքարելու ենք այս ապօրինի իշխանությունը բռնազավթած Ռոբերտ Քոչարյանի եւ Սերժ Սարգսյանի դեմ: Նրանք, որ կարծում են` իրենց դեմը խաղ չկա, խաղը արդեն սկսվել է, եւ մենք այս անգամ իրենց կազատենք այդ պաշտոններից: Ժողովուրդն է երկրի տերը, ոչ թե Ռոբերտ Քոչարյանը եւ Սերժ Սարգսյանը, որոնք աքսորում են մարդկանց իրենց բնակարաններից: Անկանխատեսելի քայլեր կարող են լինել. ժողովրդի ալիքը, որ լինի, մենք չենք կարող ասել, թե հետեւանքն ինչ կլինի: Քանի կարող են թող դիմում գրեն, հետո կարող է ուշ լինել, անգամ դիմում գրելու ժամանակ չունենան",-ասում էին ցուցարարները:

Ցույցի պահին կառավարության շենքի մոտ եկավ "18+8" ֆորմատի շարասյունը` սահմանադրական փոփոխությունները բոյկոտելու քարոզով: Ի դեպ, ցույցի պահին ցուցարարների միջեւ փորձ արվեց բաժանել թռուցիկներ` "Ժառանգություն" կուսակցության նախագահ Րաֆֆի Հովհաննիսյանի կոչով եւ հիշեցումով, թե երբ, որտեղ եւ որ ժամին է սկսվելու"քաղաքացիական ժողովը": Ցուցարարներին, սակայն չհաջողվեց ձեռ բերել այդ թերթիկներից գոնե մեկը: Կառավարության շենքը քաղաքացիներից պաշտպանող ոստիկանները "առգրավեցին" թերթիկների ողջ կապոցը:

Մի առ ժամանակ անց ցուցարարները շարժվեցին ՄԱԿ-ի հայաստանյան գրասենյակի շենքի մոտ, որտեղ իր հացադուլ-նստացույցն է շարունակում 54-ամյա Գագիկ Գուրգենի Սարգսյանը: Վերջինիս այսօր առաջին անգամ այցելել է նաեւ Կարմիր խաչի ներկայացուցիչները եւ խորհուրդ են տվել դադարեցնել հացադուլի, քանի որ առողջությունն ավելի թանկ է: Հիշեցնենք, որ Ամիրյան 4/18 հասցեում պետության կողմից պահպանվող Գագիկ Սարգսյանին պատկանող պատմամշակութային շենքը նոյեմբերի 9-ին քանդել են, չնայած որ համաձայն դատարանիª նրան պետք է վտարեին միայն նոյեմբերի 23-ին: Հացադուլավորը իր 74-ամյա մոր հետ հայտնվել է փողոցում: Իսկ ՄԱԿ-ից խնդրում է մի այլ երկրում իրեն ապաստան տալ:

Նշենք, որ Գագիկ Սարգսյանի առողջական վիճակը վատ է, բժիշկները նրան անընդհատ զննում են: Նույնիսկ այն բանից հետո, երբ ականջից արյուն է սկսել գալ, ցուցարարը հրաժարվում է դադարացնել հացադուլը եւ մտադիր է իր պայքարում գնալ մինչեւ վերջ: