Հայաստանի կամերային նվագախմբի երաժիշտները, այլ երաժիշտներ, արվեստի ջատագովներ ու
Կոմիտասի անվան կամերային երաժշտության տան մերձակա շենքերի բնակիչները զայրացած են
Երևանի կենտրոնում ևս մեկ սրճարանի կառուցմամբ և մտահոգված Հայաստանի արվեստի
նկատմամբ ցուցաբերվող արհամարհական վերաբերմունքից:

Երեքշաբթի համերգասրահի մոտ մաեստրոն ղեկավարում էր բողոքի ցույցը
Եթե նրանց մտավախություններն իրականանան, ապա արդեն այս ձմեռ Հայաստանի մշակույթի
ամենասիրված դեսպաններից մեկը` պետական կամերային նվագախումը, ստիպված կլինի
պայքարել բիլիարդանոցի աղմուկի և, ավելի վատ` խլացնող ցածրակարգ երաժշտության դեմ:

Երբ սեպտեմբերին նվագախումբը վերադարձավ ամառային արձակուրդից, Կամերային
երաժշտության տան շրջակա զբոսայգին, որն ի սկզբանե նախատեսված էր որպես բնական
ձայնամեկուսիչ գոտի, վերածվել էր շինհրապարակի. ծառերը կտրել էին, իսկ հողը ծածկել
բետոնով:

Մեկ ամիս առաջ պետական կամերային նվագախմբի գեղարվեստական ղեկավար և գլխավոր
դիրիժոր Արամ Ղարաբեկյանը հանդիպել է նախագահ Ռոբերտ Քոչարյանի հետ, որպեսզի հայտնի
իր մտահոգությունների մասին: Ըստ Ղարաբեկյանի` նախագահը հետաքրքրվել է հիշյալ
խնդրով և նույնիսկ ներկայացուցիչ ուղարկել շինարարություն:

Սակայն դրանից հետո էլ շինարարությունը շարունակվում է արագ թափով: Բանվորներից
մեկն ասաց, որ աշխատում են առավոտյան ժամը 7-ից մինչև ուշ գիշեր, որպեսզի
դեկտեմբերին շահագործման հանձնեն կառույցը:

Երեքշաբթի Ղարաբեկյանի գլխավորությամբ մոտ 60 բողոքավորներ էին հավաքվել կամերային
երաժշտության տան մոտակայքում` «Վե’րջ տվեք մշակույթի ջարդին» պաստառի տակ:

Այսօր` հոկտեմբերի 21-ին, տեղի ունեցավ ևս մեկ հանրահավաք, որի ժամանակ Երևանի
նախկին քաղաքապետ Սուրեն Աբրահամյանն ասաց, որ այն փաստը, որ սրճարանը կառուցվում
է, վկայում է, որ նախագահը դրան հավանություն է տվել:

«Դասական երաժշտություն և բիլիարդի բացօթյա սրահ, գարեջրատուն, սրճարան, որքա~ն
համահունչ են,- հեգնում է զայրացած մաեստրոն: - Մենք [Երևանը] ունենք դասական
երաժշտության համար նախատեսված ընդամենը երկու համերգասրահ` Կամերային երաժշտության
տունը և Ա.Խաչատրյանի անվան համերգասրահը, այլընտրանք չունենք»:

Իսկ Երևանի կենտրոնում սրճարանները, որոնցից մեկն էլ կառուցվում է Կամերային
երաժշտության տան հարակից այգում, իրենց խտությամբ արդեն գերազանցում են կտրված
պուրակներին (այս գարնանը քաղաքի կենտրոնում գործում էր 427 սրճարան` մեկը կենտրոնի
յուրաքանչյուր 304 բնակչի համար):

Իրականում մոտակա «9-րդ ալիք» սրճարանն արդեն խանգարում է Կամերային երաժշտության
տան համերգներին: Ապրիլին համերգասրահի ղեկավարությունը բողոքել է նախագահի
վերահսկողության ծառայություն, սակայն միջոցներ չեն ձեռնարկվել:
 

«Անցյալ տարի, երբ այստեղ ելույթ էր ունենում Անգլիայի Չիլինկարյան քառյակը,
ընդմիջմանը երաժիշտները քմծիծաղով ասացին. «Կարծես շուկայում նվագելիս լինենք»: Դա
մեզ համար, մեր ազգի համար խայտառակություն է»,- ասում է Ղարաբեկյանը:
 

Երևանի քաղաքապետարանի քաղաքաշինության վարչությունից հայտնեցին, որ Կամերային
երաժշտության տան հարակից տարածքում, որը միշտ հանրային զբոսայգի է եղել,
հողահատկացման որոշում կայացվել է դեռևս 1998 թվականին: Իսկ այս տարվա սկզբին
Կենտրոն թաղապետարանը տարածքը տրամադրել է «Ֆլորեն- Լենդ» ՍՊԸ-ին` շինարարական
աշխատանքներ կատարելու թույլտվությամբ: Ըստ շինարարությունն իրականացնող բանվորների`
ընկերությունը պատկանում է մոսկվայաբնակ մի հայ գործարարի:
 

Ղարաբեկյանն ասում է, որ հանդիպել է ընկերության ներկայացուցչի հետ, սակայն նրա
բացատրությունները գոհացուցիչ չեն:
 

Հայտնի է, որ կենտրոնի օբյեկտներից շատերը «ստվերային» տերեր ունեն, մինչդեռ
իրականում պատկանում են օլիգարխների և բարձրաստիճան պաշտոնյաների, այդ թվում`
նախարարների և ԱԺ պատգամավորների: «ԱրմենիաՆաուի» այն հարցին, թե իր կարծիքով ովքեր
են սրճարանային համալիրի «իսկական» տերը, Ղարաբեկյանը պատասխանեց.
 

«Դա ինձ բնավ չի հետաքրքրում` թեկուզ Հռոմի պապը: Միևնույն է` դա սխալ է»:
 

Սրճարան կառուցելու թույլտվությունը սխալ է համարում նաև Կոմիտասի անվան քառյակի
գեղարվեստական ղեկավար Էդուարդ Թադևոսյանը, քանի որ դա մարտահրավեր է նաև արվեստի
ու մշակույթի համայնքի մյուս անդամներին:
 

«... Հեռանանք, թող սրճարանատերերը վայելեն, խժռեն այգիներն ու մշակութային
օջախները»,- ասում է նա:
 

Նույնքան հուսահատ էր նաև կամերային երգչուհի Աննա Մայիլյանը, որը հաճախ է ելույթ
ունենում այդ սրահում:

«Մինչ մյուս երկրները ծաղկեցնում են իրենց մշակույթը, Հայաստանը որոշել է վերացնել
այն: Ժամանակն է, որ հայերը սթափվեն ու մտածեն ոչ այնքան ստամոքսի, որքան հոգու
մասին»,- ասում է երգչուհին:

«ԱրմենիաՆաուն» փորձեց քաղաքապետարանի և Կենտրոն համայնքի թաղապետարանի միջոցով
խոսել «Ֆլորեն-Լենդի» ներկայացուցչի հետ, սակայն ոչ մեկը չկարողացավ ասել, թե ում է
պատկանում ընկերությունը:
 

Կամերային երաժշտության տան ճարտարապետական լուծումներն այնպիսին են, որ բուն
համերգասրահը նախասրահ չունի, ինչը գոնե որոշ չափով կմեղմեր դահլիճ թափանցող
աղմուկը: Բացի այդ, շենքի մեծ մասն ապակեպատ է, իսկ պատերը միաշերտ են:
 

«Այգին ի սկզբանե ճարտարապետի կողմից նախագծվել է որպես ձայնամեկուսիչ գոտի,- ասում
է Ղարաբեկյանը: - 2002 թվականից համերգասրահի անդորրը խախտվեց «9-րդ ալիք» սրճարանի
պատճառով, իսկ եթե այս մեկն էլ կառուցվի, համերգասրահը պարզապես կարող ենք փակել»:

Գայանե Աբրահամյան
«ԱրմենիաՆաուի» թղթակից