Կրթության առանձնահատուկ կարիքներ ունեցող երեխաների առողջական վիճակի գնահատման արդյունքների համաձայն Երեւանի հատուկ դպրոցներում գտնվող հատուկ կարիքներ ունեցող երեխաները ունեն բազմաթիվ առողջական եւ զարգացման խնդիրներ:

Հետազոտությունը իրականացվել է «Երեխաների առողջության պահպանման ասոցիացիա» հասարակական կազմակերպության կողմից, ՀՀ կրթության եւ գիտության նախարարության պահանջով եւ ՄԱԿ-ի մանկական հիմնադրամի հայաստանյան գրասենյակի անմիջական աջակցությամբ:

Հետազոտությունը իրականացվել է մտավոր հետամնաց երեխաների Նուբարաշենի N1 եւ 11 դպրոցներում, վատ լսող երեխաների N9 դպրոցում եւ վարքագծային խնդիրներ ունեցող երեխաների Նուբարաշենի N18 դպրոցում:

Այս դպրոցներում ուսումնասիրության ենթարկված երեխաների ավելի քան 60%-ը Երեւանից էին, մնացածը` հարեւան մարզերից: Հետազոտված երեխաների մոտավորապես 16%-ը (62 երեխա) չէր համապատասխանում դպրոցի չափանիշներին, այնուամենայնիվ այդ երեխաների ներառումը հանրակրթություն արդեն ուշացած է:

Բազմաթիվ երեխաների մոտ հայտնաբերվել են քրոնիկ հիվանդություններ, այդ թվում այնպիսիք, որոնց համար անհրաժեշտ է անհետաձգելի բժշկական միջամտություն: Մասնավորապես հետազոտված երեխաների մոտ 17%-ը ունի լսողության խանգարումներ, որոնք առաջացել են քրոնիկ նշիկաբորբի եւ միջին ականջի բորբոքման պատճառով:

Հաճախ դպրոցի ղեկավարությունը չի կարողացել երեխաներին տրամադրել համապատասխան բժշկական օգնություն մասնագիտացված բժշկական անձնակազմ, ինչպես նաեւ հատուկ բժշկական միջամտություն թույլատրելու իրավական լիազորություններ չունենալու պատճառով:

Հետազոտությունը ցույց տվեց նաեւ, որ 391 երեխաներից 28-ը (7%) ենթարկվել է ֆիզիկական բռնության ընտանեկան միջավայրում իսկ 9-ը երեխա (2%) բռնության է ենթարկվել դպրոցներում: