ԱԼՄ հոլդինգի նախագահ Տիգրան Կարապետյանը մտադիր չէ գնել մարզային որևէ հեռուստաընկերություն, թեև իր այդ մտադրության մասին նա հայտնել էր իր վերջին ասուլիսներից մեկում։ Նա հայտարարել էր, որ իր այդ մտադրությունն ի կատար ածելու համար հավանաբար կդիմի Ռուսաստանի իր ընկերներին, որպեսզի վերջիններս ֆինանսական աջակցություն ցուցաբերեն։
NEWS.am-ի թղթակցի հետ զրույցում Կարապետյանը նշեց. «Ես չեմ ուզում ոչ մի եթեր, որևէ զիջում։ Ես զիջումը կարող եմ ընդունել միայն ժողովրդի կողմից, և ոչ թե իշխանությունների։ Ու ոչ էլ ուզում եմ որևէ մի բան առել»,-հայտարարեց Կարապետյանը։ Նա նշեց նաև, որ փոխելու է ժողովրդի հետ շփվելու իր մարտավարությունը: «Եթերային գործչից դառնալու եմ ժողովրդի հետ դեմ առ դեմ շփվող հրապարակային գործիչ: Ես այսուհետ հասարակության հետ շփվելու եմ բացառապես հանրահավաքների միջոցով»,-հայտարարեց Կարապետյանը։
Նշենք, որ ԱԼՄ հեռուստաընկերությունը եթերում այլևս չի լինի հունվարի 20-ից։ ՀՌԱՀ-ի կողմից հայտարարված թվային հեռարձակման մրցույթում ԱԼՄ-ն պարտվել է «Երևան» հեռուստաընկերությանը։

Աղբյուր՝ http://news.am