Նոյեմբերի 14-ին ժամը 15-ի սահմաններում Էրեբունի բժշկական կենտրոնից ոստիկանության Կենտրոնի բաժին ահազանգ է ստացվել, որ պարանոցի և մարմնի տարբեր մասերում կտրած-ծակած վնասվածքներով, Զավարյան 49/1 հասցեից իրենց մոտ են տեղափոխել 13-ամյա Սարգիս Դավիթի Վարդիկյանին: Երեխան, գիտակցության չգալով, հիվանդանոցում մահացել է: Նա սովորում էր թիվ 2 վարժարանի 9-րդ դասարանում:

Ոստիկանության կենտրոնի բաժնի աշխատակիցները շտապ մեկնել են Զավարյան փողոց, որտեղ նշված հասցեի դիմաց հայտնաբերել են արյան հետքեր, ինչպես նաև այն տաքսի ավտոմեքենան, որով Սարգիս Վարդիկյանը տեղափոխվել էր բժշկական կենտրոն:

Ոստիկանության Կենտրոնի բաժնի պետի գլխավորությամբ ստեղծել է օպերատիվ քննչական խումբ: Օպերատիվ աշխատանքների արդյունքում իրավապահները կարողացել են պարզել, որ 13-ամյա Սարգսին դանակի մի քանի հարվածներ հասցրել է Արտակ Մելքոնյանը, ով հանրությանը հայտնի է «Գժոյանների Արտակ» մականունով:

Ինչպես հայտնեց ֆոտոլրագրող Գագիկ Շամշյանը, Ա. Մելքոնյանը Կենտրոնի ոստիկանության ուղեկցությամբ տեղափոխվել է Ձերբակալվածների պահման ժամանակավոր մեկուսարան: Ոստիկանության քննչական գլխավոր վարչության Կենտրոնի քննչական բաժնում հարուցվել է քրեական գործ ՀՀ ՔրՕր.-ի 104 հոդվածի հատկանիշներով (Սպանություն):

Ոստիկանությունն առգրավել է նաև հանցագործության գործիք դանակը:

Դեպքի վայրում հարևանները, ովքեր չցանկացան ներկայանալ, հայտնել են, որ սպանությունը վրեժխնդրության (վենդետա) հետ է կապված:

Հիշեցնենք, որ 2009-ի նոյեմբերին սպանվել էր Արտակ Մելքոնյանի 12-ամյա որդին` Սոս Մելքոնյանը և Սոսի սպանության մեջ մեղադրվում էին 2 մարդ, որոնցից մեկը դատապարտվել և այս պահին գտնվում է ազատազարկման վայրում, իսկ Սարգիս Վարդիկյանը, ով նաև մասնակցություն է ունեցել Սոսի սպանության մեջ, չի դատապարտվել հանցագործության սուբյեկտ չլինելու պատճառով:

Երեկվանից ոստիկանության մի քանի ստորաբաժանումներ հսկողության տակ են վերցրել Գժոյանների բնակության վայրը, քանի որ կա լուրջ մտավախություն, որ հնարավոր է վենդետան շարունակվի:

Աղբյուր՝ http://lragir.am